تجربة اجتماعية مع مطار تونس و الحمد الله مع فترة الكورونا، ماكنتش باش نهبطها أما موش مشكلة هانو شويا تنبير و ضحك.

يا معلّم قداشنا نموتو على الاوراق في تونس نعشقو حاجة اسمها ورقة و نسخة مطابقة للأصل و التزام و تعريف بالإمضاء و صحح، تي فمّا شكون مازال يطبع في التذكرة متاعو بالصفحة متاع terms & conditions و مزال الديواني يعمل في سيقارو في الكونتوار و يطفي السواڨر في كاس قهوة و مازالت الي تعملك check-in تمكيج بالأزرق في جفون عيناها تڨول طاوس و مزالو فمة باريارات حديد ڨدام المطار و في وسط المطار زادا تڨول معرض نابل في التسعينات قريب باش تلڨى واحد يبيع في لحية جدي ڨدام باب الرّحيل، و مازال انت واڨف باش تعمل check - in يجي ڨدامك واحد سيفيل لابس سورية كاروات و كرشو هابطة على السبتة و حاطط وراه واحد حاشم و لابس بانانا ، درا شكون وصّاه عليه يكلملو الطاوس باش تعديه و ما تكلموش على الباڨاج الزايد و تعطيه carte d'embarquement ڨدامك و جرب كانك راجل تكلم ڨلو يا معلم راك دخلت في الصف و انت جيت قبل، ماهي توليلك قضية و تعدي على أمني أثناء العمل و تولي انت عطلت الرحلة الكل و و

 و نرجعو للطاوس الي تسيب خلق ربي و تكبش فيك كان انت و تبدى تسأل فيك في هاك السؤال الذكي: وين ماشي ؟ و تبدى تورّق في الباسبور متاعك و تغزرلك من تحت les moucharabieh متاعها الزرق و تڨلك: ااممم اي مالا ويني الفيزا ؟ و انت تڨلها اهيكا فتها مادام ارجع للصفحة لخرى ..تڨلك أممم موش واضحة و باش ما تذرّحش روحها تكمل زعمة زعمة باش تتأكد تعيط لسي الطيّب ..يجي سي الطيّب مسنطر روحو هاكلي هو مولا المطار و معلّق البادج الي غالبا تكون غماقت من الوسخ و يبدى يثبّت في باسبورك و انت عاقل تتبسّم و باعد يڨلّها - مريڨل - و يمشي صدرو القدام و يعطيك ڨحرة على حنب تحسّو كان موش هو راك ماتطلعش في الطيارة و كان موش منو هوا راهو ما ينجّم حدّ يسافر..

تعطيك الطاوس أوراقك تجبدلك فاليجتك بكلّ عنفوان و تغلّفها بهاك الفازة و الباقي طيشو بحذاها فوق كدس الباقي متاع الرّولوات تڨول حفلة متاع عيد ميلاد وين هي ڨاعدة 

..و تضرب الفاليجة بضربة باش طيّحها على السبتة و تبدى السبتة تمشي و إنت مخّك شطر أيا سلكت و شطر الفاليجة توصل ياربّي و ما يسرقوهاش التماسح الي توكل و تسرق و لا تخاف ربي ولا تخاف من عبادو ..

تعمل هكة ترجع لأصحابك و خواتك و خالاتك و اولادها و عماتك و أولادها و جيرانك، ماهو الكل جوو يوصلو فيك ..تڨلهم سي بون و انت تحط في carte d'embarquement في وسط الباسبور و تخلّي الورقة الصغيرة الي فاها Gate مدوّر بالستيلو الازرق من الطاوس صاحبة الجفون الزرقاء .تحط باسبورك في بانانا و الا sac a dos و تمشو زنفليڨة مع بعضكم متجهين لباب الرحيل وين تتقابلو مع الزنفليڨات لخرين الي يوصلو في واحد مسافر 

..بكلها جموع ماشية نفس الاتجاه تڨول كليب متاع راب و ناس الكل تحبس عند الباريار أي تخيل باريار فوسط المطار تڨول يحوزو في العلالش المهم توصلو غاديكا باش يودعوك و تعاود تخرج باسبورك للبوليس الي واقف غادي الي اصلا باخل باش يورق باسبورك و يشوف هل انت بالحق صاحب الجواز...

 و تتلفت تلوج على الوجوه الي تعرفها في وسط الخلطة الي خليتها وراك و تبايبي عبارة بورڨيبة طالع.

نأكدلك الي انت تفاهمت مع الي وصلوك باش يزيدو يبقاو ڨدام باب الرحيل نصيّف ساعة " على ما ياتي" و نأكدلك الي هوما ما يڨعدوش حتى درج بعدك ..اما لا علينا..

تدخل تلڨى 20 صفّ و تلڨاك تكمبس اناهو اقصر صفّ و باعد تتفكر الي انت ما عمرتش هاك الورقة الي كان في تونس تلڨاها "بطاقة نزول او ركوب " و مهما تكون سافرت ڨداش من مرة ما تعرفش اناهي الي باش تعمرها partie فوڨانية و الا اللوطانية ! بطبيعة باش تبدى تلوج على شكون عندو ستيلو و انت كل مرة تڨول المرة الجاية ماعادش نعاود هالعملة الكلبة و تجيب معاك ستيل و باش تشوف حضبة تڨول يلعبو في الخربڨة لوطة على القاعة تمشي تلڨاهم الكل يستنو في الستيلو متاع هاك الطفلة الي مسافرة و عندها ستيلو و تخليه و تمشي و ستيلو هذاكا يبقى للمسافرين متاع الرحلات لخرين لين انت ترجع بعد عامين في أول كونجي ليك تلڨى نفس الستيلو أما ولا معضوض من تالي.

انت تو عمرت الفوڨانية و اللوطانية خاطر ماكش متأكد .. و جا دورك و تمد باسبورك لديواني ديما تحسو موش عاجبو شي ..اصلا ما يغزرلكش ..فقط يلوج على التمبري و يشوف جوّك مسافر برشة و الا شوية. .. فاهم الللعبة و الا لا ..كانك مسافر برشة باش يتفقدلك اوراقك و يحطلك باسبورك بضربة على الكونتوار الازرق المقرقش ..ضربة تحسّها متاع شكبّة ..كان اول مرة تسافر و الا ماكش مستانس باش يطلبك في التمبري ..انت تتفجع و هو هو يڨلك تو باش تبقى راجع البرة ماعادش عندك وقت هاو تمبري ..حط 60 دينار في الباسبور و هو بطبيعة منحي تمبري ملي تعدّي قبلك و الا مل بارح و بالطبيعة باش تكح 60 دينار لأنك بهيم و أول مرة أما في المستقبل تتليع منها الحكاية هاذيكا أما الستيلو كون متأكد إنك باش تنساه ...

ايا سيدي تعديت ..تلڨى جماعة Angry Birds و free fire و clash of clans و تعرف كل جماعة من الحس متاعهم

و تكمل تمشي لوين ما يسمى Scanner نا الجماعة هاذوكم يضحكوني ياسر ..محضبين موش خاطر باش يشوفو انت اش معدي خطير لا ..اما فماشي كعبة Parfums تفوت ال 100 مل باش يفكوهالك و يروحو باها 😂

و الا ممكن حاجة اخرى اما معضمهم باهين خاطر ديما فما ڨرايدي بالنجوم غاديكا راكش.. 

ايا سيدي تعديت تهز البانو متاعك و تبدى تلبس في حوايجك و تحط في السبتة متاعك تڨول كنت راڨد و فقت مخر و لازم تلبس و تخرج ..ديراكت تلڨى روحك في Free Shop 😂😂😂

هاني بديت نضحك ملي ڨلت فري شوب وين تلڨى porte clés هاكا متاع دينار يبيعو فاها ب 8 اورو كان صدقني ربي بكل ثقة نفس و تشوف لتر زيت زيتون اغلى من شجرة الزيتون و برشة حاجات انت اصلا ما تشريهمش في السوڨ الاسبوعية وتشوف lunettes Calvin Klein wela Gucci بسوم خيالي و مودال 10 سنين التالي و انت في مخك: موش مشكل تو نشراها من وين باش نمشي نا ارخص و خير و مودال جديد ..

اما هوما الي في فري شوب بالحق حاطين الي انت ما تعرفش و الا ممكن هوما ما يعرفوش المود ما نعرفش ..الحاصيلو تعمل دورة و ما تشري شي غالبا خاطر تحسو للتوريست و التوريست ساعات يشرو ..ساعات ...

تكمل طرف الڨدام في اتجاه Gate تشوف المصمودي ..تدخل تشوف الاسوام تتفلڨ بالضّحك تحسّ حاسس روحي Boutique Swarovski 😂😂

بكل رقعة و صحة عين يحسبلك الطرف calories الي باش يحطهملك في باكو اكبر شوية من باكو دخان بسوم متاع ميترو تراب..لا علينا ايا سيدي تكمل في اتجاه ال Gate كان تتكيف تڨول برة نعمل سيڨارو قبل الرحلة تدخل لقاعة التدخين ههههههههه وليت نضحك rien que تفكرتها 😂 بلاصة بالحق تضحك تحس روحك دخلت لحمّام و تلوج على سطل فارغ في وسط غبارة الضباب تحس روحك خارج من جامع و ثما زردة و الدنيا عجعاجي بالدخان و الجماعة اعطيه يكمل سيڨارو و يخرج من الغمة ..ايا سيدي تكيفت خرجت تجبد تاليفونك تلڨى أمك طالبتك 50 مرة مفجوعة عليك تڨول حارق ..تكلمها ديراكت "يامة هاني تعديت - تڨول معدي زطلة و ما حلبوش بيك - يامة نطلع نص ساعة اخرى- و تسمع احلى جواب و احلى كلام: برة وليدى ربي يوجهك خير ..كي توصل كلمني عيش ولدي - باهي يامة سكري باب الخزانة متاعي و خلي المفتاح عندك " 

تكمّل بثبات في الكولوار الي يهز لل Gates ...تي هوما 4 و الا 5 Gates في مطارنا حاطينهم بحذى بعضهم تڨول ديار سنافر ..تلڨى هاك السيد الي عندو مطعم - Bar - ولا whatever it is called -- وين الكسكروت فيه تفشة خصّ ، لڨشة طماطم ، طرف جبن و ريشة متاعة دجاجة ب 8 دينار و الا اكثر و ايي حاجة سومها × 4 من السعر العادي كعبة ميلفاي ب 6 دينارات و متأكد إنها من عام 56 و هيا في نفس البلاصة و كل شي محطوط عليه أسوام تخبس المخ ..تحس روحك وصلت ديجا لاوروبا وانت مازلت ما طلعتش - 

تشوف الجموع تتكيف عادي و كل واحد راكش يستنى 

لهنا انت و Destination و من غير ما تقرى ال Destination في Ecran هاو كيفاش تعرفهم:

- جماعة تركيا: يا تلڨاهم كوبلووات راجل هو مخلص كل شي لغاية في نفس يعقوب لا علينا في الموضوع ، يا تلڨاهم هاكا جماعة lunettes pare brise كي لولاد كي لبنات مروال تشعشع و دجين sablé و logo Gucci و الا Burberry كبيرة عللخر 

يا تلڨاهم كلاس و هاذوكم جماعة on a voyagé pour vous en Turquie 

- جماعة فرانسا منقسمين étudiants و تلقى sac a dos و 3 و الا 4 فاليجات صغار باڨاج يا مواطن بالخارج عادة يتكلم في التلفون يطلب في السماح من صاحبو الي جاء و ما لڨتش الوقت باش يقابلو و في ايدو شيشة و الا جمل cadeau

- جماعة الخليج ضخامة و ديما برشة فاليجات و برشة صغار معاهم تحسهم عايشين باش يجيبو الذري

- جماعة امريكا تعرفو في يدو اخر Iphone و كل شي Apple و ما نعرش علاش ديما لابسين Casquette 

- و جماعة ليبيا و موقاديشو و الشيرات هاذيكا ديما خفيف اما باقاج في هاك الشكارة البلاستيك بيضة و حمراء و زرقاء كاروات 

ديما وانت تستنى في قاعة الانتظار ماكش باش تلڨى حتى بريز فاضي خاطر ديما فمة شكون يشرجي و بطبيعة عندنا 3 و الا 4 برزاوة فيهم ديما زوز ما يخدموش 😂

تتلفت تلڨى فمة شكون شادد الصف واڨف باش كي يبدى الصف اهوكا هوما يكونو لولانين تڨول الطيارة ماعادش فاها بلايص و الا مسكين تعود بلواج سيدي بوزيد صفاقس و الا سوسة تونس الي يخلط لول يوخذ بلاصة، 

و تعمل هكة تجي الطاوس و تعمل اعلان في الميكرو بلاش لغة انقليزية بطبيعة خاطر هي فرنكوفون الي يڨلك 😊

دوب ما تعمل الاعلان الجماعة الكل تدخل بعضها و توڨف تحسها امام و اقام الصلاة و اصطفو يرحمكم الله 😁

تبدى تڨطع في للاوراق تڨول استاذة تصلح في الدوفوارات و انت بعد تشد المسرب و تدخل للطيارة و انت و طيارتك ..كان تونيسار تعرف البقية و كان طيارة اخرى فمة 80 % باش تلڨى شكون ڨاعد في بلاصتك و كان ما فمة حد باش يجيك شكون يتيتم يڨلك نبدلو ؟ نحب نڨعد مع درا شكون بحذى بعضنا و ديما الدرا شكون هذاكا و الا هذيكا تكون اول مرة باش تسافر و خايفة ديما القصة هكاكة و نفس الكذبة و الكلهم قارين عند نفس المدب، أما بالطبيعة نا وجهي مو الفريب و مانحشمش و بكل صحة عين نتلفتلها نڨلها سامحني أختي أما الكرسي هاذا عاجبني و مانحبش نبدل.

كان لڨيت بلاصة لفاليجتك سلكتها و تسمع المضيفة تحاول في العباد باش يسكرو تليفوناتهم و تكمل تعمل دورة تتفقد تڨول القيم العام في ليسي و تطلع الطيارة و هي طالعة تبعث ميساج لماماك و تڨلها هاني طلعت صايي و تعمل تصويرة للسحاب و تونس و تهبطها في الفايسبوك و تڨول ماعادش نرجع للحفرة، أما العام الجاي تبدى تجرب باش تروح، الله غالب الكلب ديما يتوحش الحفرة متاعو.

و تقرى ما تيسر من القران في ڨلبك و تحط بعدها موزيكا.

-منقول بشويا تصرف أو ياسر و بالكشي نا هوا الي كتبتها، تعبت من الكتيبة و تونس ماتعبتش تصبحو على خير يزي-